गाण्यावरून कथा - हृदयी प्रीत जागते जाणता अजाणता - भाग १

सायलीची नजर त्याला शोधत होती. तिने पूर्ण बसभर नजर टाकली पण तिला तो कुठेच दिसला नाही. तिच्या मनाला हुरहुर लागून राहिली. कारण फक्त सकाळी बस मध्येच तो दिसत होता नंतर पूर्ण दिवसभर काही त्याची छबी ती पाहू शकत नव्हती. सायली ज्या सोसायटीत राहत होती तिच्या घरासमोरच नेने काकू राहत होत्या. त्यांच्या घरी एक तरुण राहायला आला होता. बरेच दिवस ती त्याला तिकडे बघत होती. सोसायटीची एक स्टेशन पर्यंत जाणारी बस होती. सायली रोज ऑफिसला जाताना स्टेशन पर्यंत त्याच बसने जात होती. तो तरुण पण तिच्याच बसमध्ये असायचा. रोज नजरानजर व्हायची. सायलीला तो आवडू लागला होता. त्या तरुणाला पण ती आवडत होती. सायली दिसायला देखणी होती. मध्यम उंची, कमनीय बांधा, लांब सरळ केस, पिंगट डोळे. कोणालाही बघता क्षणीच आवडेल अशी होती सायली. तो तरुण पण पावणेसहा फूट उंची,गव्हाळ वर्ण, कुरळे केस आणि कोरलेली दाढी असा खूपच रूबाबदार दिसायचा.