प्रस्तुत कथा ही काल्पनिक असून त्यात नाव,गाव,
स्थळ, प्रसंग, जीवित अथवा मृत्यूशी संबंध आला तर तो योगायोग समजावा.
स्थळ, प्रसंग, जीवित अथवा मृत्यूशी संबंध आला तर तो योगायोग समजावा.
शीर्षक: सहनशील भाग-१
" आता आमचे धाकटे जावई बघा, त्यांनी कसं सर्व नीट केलं आहे, परंतु आमच्या मोठ्या जावयाकडे बघितल्यावर मला तर त्यांच्याबद्दल सांगायला सुद्धा कसेतरी वाटते." श्रीरंगराव म्हणत होते.
पाहुण्यांसाठी चहा घेऊन आलेल्या सुजाताला ते ऐकून वाईट वाटले.
सुजाता आपल्या भावाच्या लग्नासाठी माहेरी आली होती. सुजाता श्रीरंगरावांची मोठी मुलगी होती आणि त्यामुळे तिचा नवरा श्रीरंगरावांचा मोठा जावई होता.
सुजाता मोठी मुलगी असल्यामुळे तिचे लग्न लवकर करण्यात आले होते. त्यावेळी तिच्या नवऱ्याचे किराणा मालाचे दुकान हे व्यवस्थित नफ्यात असल्यामुळे श्रीरंगरावांनी आपल्या मुलीचे लग्न अरविंदशी लावले होते. कारण आपली मुलगी डोळ्यांसमोर राहील आणि काही गरज लागली, तर ती सुद्धा लगेच आपल्या घरी येईल असा त्यांनी विचार केला होता. सुजाता सर्व कामात पटाईत होती.
सुजाताच्या छोट्या बहिणीचे लग्न हे एका आर्किटेकशी झालेले होते आणि तसेच चांगल्या हुद्द्यावर काम करत असल्यामुळे त्याचे कौतुक नेहमीच होत असायचे.
" आजचा दिवस राहणार आहेस ना. कारण उद्या आपल्याला लगेच मांडवामध्ये जायचं आहे." सुजाताची आई तिला म्हणाली.
" आई, मी उद्या थेट लग्नातच येते, तसं पण आता सर्व कामे झालेली आहेत." सुजाता बोलून पाऊण तासाच्या अंतरावर असलेल्या आपल्या सासरी जाण्यासाठी निघाली.
"हातावर मेहंदी तरी काढ. नवऱ्या मुलाची मोठी बहीण आहेस." तिची आई मात्र तिला मेहंदी काढण्याचा आग्रह करत होती.
" नको, उगाच त्या मेहंदीच्या वासामुळे काही बनवायचं असेल तर ते राहून जातं. तुम्ही सगळ्यांनी तर काढलेलीच आहे आणि तसे पण करवली म्हणून तुमची छोटी मुलगी तुमच्या मुलाच्या लग्नामध्ये जास्त शोभून दिसते." असे म्हणून तिथून ती निघून गेली.
तिला लग्नाच्या सुरुवातीचे दिवस आठवत होते. सुजाताचा नवरा अरविंद याला तिच्या घरामध्ये मान मिळायचा, परंतु जसा त्याचा किराणा मालाचा व्यवसाय तोट्यात जायला लागला तसे मात्र तिच्या वडिलांचे त्याच्या प्रति असलेले वागणे बदलले होते. तिला तिच्या बहिणीबाबत किंवा तिच्या भावाबद्दल कधी ईर्षा नव्हतीच, परंतु आपल्या नवऱ्याने असे यांचे काय बिघडवले आहे, त्यामुळे हे असे वागत आहेत, हेच तिला समजत नव्हते.
" काय गं, तू तर थेट दोन-तीन दिवसांनी येणार होतीस ना? आज कशी काय अचानक आलीस आणि येणार होतीस तर मला फोन का केला नाहीस? मी तुला घ्यायला आलो असतो." अरविंदने घरी आलेल्या सुजाताकडे पाहून विचारले.
" तिथली कामं झाली होती आणि आज मला इथे झोपायचे होते. इथे मी झोपू शकत नाही का?" तिने विचारले.
" अगं, तुला सहजच विचारत होतो." तो म्हणाला.
अरविंदला सुद्धा काहीतरी तिचे बिनसले आहे, असे वाटत होते. त्याच्या आईने जेवण बनवून ठेवले होते आणि सर्व काम झाले होते. सगळेजण झोपण्यासाठी जात होते. अंथरुणावर पाठ टेकल्यावर सुजाताचे विचारचक्र सुरू झाले होते. तसेच पैसा किती महत्त्वाचा आहे, हे तिला आता समजून आले होते.
अचानक हातावर थंड स्पर्श तिला जाणवला आणि ती उठून बसली, तर तिच्या हातावर अरविंद कुठे ठिपके; तर कुठे फुले अशी मेहंदी काढत होता.
" हे काय ? तुम्ही कशाला काढत आहात ? " तिने हात मागे घेण्याचा प्रयत्न केला, पण तसाच तिने हात पुढे केला आणि अरविंदने बोलायला सुरुवात केली.
" सगळ्यांनी मेहंदी आज काढली असेल. मग तू सुद्धा काढायला हवी होतीस. काय झालं? कोणी काही बोलले का?" त्याने विचारले.
" काही नाही. मला तिथे थांबावेसे वाटत नव्हते, म्हणून मी आली." त्याच्याबद्दल जे बोलले गेले होते. ते त्याला सांगण्याची हिंमत तिला झाली नव्हती.
" माझ्याबद्दल काही सासरेबुवा बोलले का?" त्याने विचारले.
तिने चमकून त्याच्याकडे बघितले.
" म्हणूनच तुम्ही थेट लग्नामध्ये येणार होतात का?" आता कुठे त्याचे घरी न येण्याचे कारण तिला उमगले.
" हो, म्हणजे आता माझं काही काम असणार आहे का ? त्यांचा दुसरा जावई आहे आणि तसे पण मला आता काम करायला जमणार नाही ना, एक किराणा मालाचे दुकान आणि दुसरे सुद्धा काम मी करत असतो." तो हसून म्हणाला.
" मला उद्या लग्नात सुद्धा जावेसे वाटत नाहीये." ती त्याला म्हणत होती.
" कोणाला जे काय बोलायचं ते बोलू दे, पण तू जर उद्या लग्नात गेली नाहीस; तर अजून चार लोकांना तुझ्याबद्दल बोलायला कारण मिळेल. तू फक्त तुझ्या मोठ्या बहिणीचे कर्तव्य पूर्ण कर आणि तू जशी म्हणाली होतीस की हेही दिवस जातील तर आपण सुद्धा तसाच विचार करू." बोलत बोलत दुसऱ्या हातावर सुद्धा त्याने मेहंदी काढली होती.
" बघ मी काढलेली ही मेहंदी उद्या नक्की रंगणार." असे म्हणून खोलीतले दिवे मालवले.
क्रमशः
पुढे काय होईल?
© विद्या कुंभार
कथेचा भाग कसा वाटला हे लाईक आणि कमेंट करून नक्की सांगा.
Download the app
आता वाचा ईराच्या कथा सोप्या पद्धतीने, आजच ईरा app इंस्टॉल करा