समांतर जगाचा प्रवासी भाग ५ (अंतिम भाग)

ती तेथे आधीपासून उभी होती. आज तिच्या चेहऱ्यावर शांतभाव होते.

“तू आलास. याचा अर्थ तू अजून तुझं जग निवडलेलं नाहीस.”

“मी निवड करायला आलोय,”
सिद्धार्थ म्हणाला, पण त्याच्या आवाजात थरथर होती.
तीने पायवाटेकडे इशारा केला.
“ही पायवाट दोन भागांत फुटते. डावीकडची पायवाट इथल्या जगात जाते. इथे तू नायक. तुझ्या स्मृती पूर्ण सुरक्षित आहेत. तुझी कथा शास्त्राच्या पलीकडली भासते.
उजवीकडची पायवाट तुझं वास्तव आहे. तिथे तुझ्या वेदना, तुझी अपूर्णता, आहे तिथे तू खरा आहेस.”

“आणि तू?”

“मी तुझ्या आठवणींचा प्रकाश. तू ज्या जगात जाशील, तिथल्या तुझ्या स्मृती मी सांभाळेन. पण एक जग निवडलंस की दुसऱ्या जगातील मी फक्त सावली उरेन.”
लॅबमध्ये रावांनी शेवटच्या टप्प्याची तयारी केली.
“तो ‘डिसिजन थ्रेशोल्ड’कडे जातोय. जर त्याने वास्तव निवडलं तर ‘क्रॉस-लिंक’ कायमची तोडावी लागेल—नाहीतर परत-परत खेचलं जाईल.”
डाॅक्टर राव म्हणाले.

“सर, हे धोकादायक आहे.”