ससा आणि कासव..गोष्ट जुनीच पण नव्याने ३

गेल्या तीन महिन्यांपासून अविनाशने घेतलेली मेहनत आणि आजवरचा अनुभव यांची योग्य सांगड घालत त्याने या क्षेत्रात चांगलंच नाव कमावलं. नोकरीत असणार्‍या कंपनीला तोडीस तोड टक्कर देणारा अविनाश आणि वाट्टेल ते करून कामे मिळवण्यासाठी धडपडणारा सोहेल. दोघांमधे एक निराळीच स्पर्धा सुरू होती. सशाच्या चालीने पुढे जाणारा सोहेल आणि सातत्याने प्रयत्न करून मेहनत आणि सचोटीवर विश्वास असणारा अविनाश यांची ओळख ससा आणि कासव अशीच झाली होती. या गोष्टीतील कासवाला असणारा संथगतीचा शाप अविनाशलाही होता- अपुरं भांडवल! याउलट सोहेल कंपनीचा पैसा वापरून वाटेल ते करू शकत होता. स्पर्धेत टिकून राहण्यासाठी तो मोठमोठ्या रकमा प्रतिस्पर्धी कंपन्यांना लाच देऊन कामे मिळवत होता. त्याच्या जोरावर तो एकापाठोपाठ एक प्रमोशन्स मिळवीत चालला होता. सशाची प्रगती वेगाने असली तरी तो गवत खायला थांबला तशी या सशानेही तीच चूक केली. एक मोठं कंत्राट मिळवण्यासाठी समोरील कंपनीच्या अधिकार्‍यांनी एक मोठी रक्कम मागितली. कंपनीची अवस्था अशी होती की तातडीने इतकी मोठी रक्कम उभी करणं तांत्रिकदृष्ट्या शक्य नव्हतं. पण ते काम अविनाशकडे जाऊ नये यासाठी तो प्रयत्न करत होता. शिवाय सोहेलने मिळवलेली कामे आणि त्यांचा दर्जा तसेच ती कामे मिळवताना होणारा खर्च यात खूप तफावत आढळली होती. काही नियमबाह्य गोष्टी केल्या गेल्या होत्या. वरिष्ठ स्तरावर याची चर्चा सुरू झाली होती. हे कॉन्ट्रॅक्ट एकप्रकारे सापळा रचावा तशा प्रकारचे होते. सोहेलसारखा ससा या गवतात हरवला आणि अलगदपणे जाळ्यात सापडला. कंपनीच्या कारभारावर लक्ष ठेवून असणार्‍या सरकारी संस्थांनी यात गैरव्यवहार झाल्याचा आरोप करत तपास सुरू केला. या गोष्टीचा प्रतिकूल परिणाम सोहेलच्या कंपनीवर झाला. ते मोठं कंत्राट या कंपनीने सोहेलकडून काढून घेऊन अविनाशकडे सोपवलं जाण्याची चर्चा सुरू झाली.