सासूबाई प्लिज ऐका ना.. भाग २

शाल्मलीचा संसार सुरू झाला. आपल्या मनमिळाऊ स्वभावामुळे ती सासरी सर्वांची लाडकी झाली. स्वप्नील तिच्यावर अगदी मनापासून प्रेम करत होता. तिचे सासुसासरेही तिच्यावर मुलीसारखी माया करत होते. शाल्मली खूप आनंदात होती. पदवीधर झाल्यानंतर शाल्मलीने एम.बी.ए.(फायनान्स) केलं होतं. एका मोठ्या कंपनीत ती नोकरी करत होती. पण लग्नानंतर तिला एक छानसं कौटुंबिक, वैवाहिक आयुष्य जगता यावं, तिच्यामुळे कोणाची गैरसोय होऊ नये म्हणून तिने तिची चांगली नोकरी सोडून दिली. किंबहूना एक श्रीमंत, सधन सासर लाभल्याने, घरात सुबत्ता नांदत असल्याने, सर्व सुखसोयी उपलब्ध असल्याने तिला नोकरी करण्याची गरजच वाटली नाही. शाल्मली आपल्या संसारात रमली. आपल्या वडिलधाऱ्या मंडळींनी आणि मैत्रीणींनी सांगितलेल्या सूचनांचं ती काटेकोरपणे पालन करत होती. सासुसासऱ्यांची सेवा करत होती. साऱ्यांची मनं जपत अगदी सुखासमाधानाने आपला संसार नेटाने करत होती.