साठवणूक (भाग ४)

“तुझ्या बहिणीला दिलं म्हणून काढत नाहीये पंकज. संसार मीही करते माझा. तू मला महिन्याचे ठरलेले पैसे देतो. त्यातून मी किराणा, दूधवाला, भाजीवाला सगळा खर्च करते. होलसेल मार्केटला जाऊन सगळं सामान स्वस्तात घेऊन येते. कधी एखाद्या वेळेला वाण सामानात सामान कमी आणलं की हे असे साबण वगैरे मी आणून ठेवते. ऑफर असतात तेव्हा वस्तू स्वस्त मिळतात, तेव्हाही घेऊन ठेवते. चार पैसे कमवत नसले तरी दोन पैसे वाचवत असते. आता कोणतीच ऑफर सुरू नाहीये दुकानांमध्ये. लग्नसराई सुरू आहे तर बॅग वगैरे महाग झाल्या आहेत. तू मात्र तुझ्या घरी गरज नसतानाही फक्त तुझा मोठेपणा दाखवण्यासाठी वस्तू नेऊन ठेवल्यास.” बोलता बोलता कीर्तीचा आवाज क्षीण झाला होता.