शाप.. उत्तरार्ध भाग ३

" सोडव रे देवा या सगळ्यातून आम्हाला." तिने देवाला हात जोडले. वैद्यांनी सांगितल्याप्रमाणे दोनच दिवसांत कमळाची प्रसूती झाली. तिला मुलगा झाला. ती इथे रूळली आहे हे बघून उमा विनायकसोबत दोन दिवस माहेरी गेली. तिथून ठरल्याप्रमाणे ते दोघे त्या सत्पुरूषाच्या दर्शनाला गेले. डोंगर चढून उमाला धाप लागली होती. कसंतरी थांबत चालत ती त्या साधूबाबांच्या गुहेपाशी पोहोचली. सगळे आत गेले. आत साधूबाबा ध्यानात बसले होते. खूप वेळ सगळेजण त्यांचे डोळे उघडायची वाट बघत होते. शेवटी कंटाळून विनायक मेव्हण्यासोबत बाहेर निघून गेला. उमा पण बाहेर पडणार तोच त्यांनी डोळे उघडले.