शब्द झाले मुके 35

खरंतर राजन हा कधीच बाप बनू शकणार नाही याचा अर्थ मानसीला देखील मातृत्वाचे सुख मिळणार नाही. मानसी देखील आई बनवू शकणार नाही आणि त्यामुळेच तिने राजनसोबत येण्यास नकार दिला. कारण तिला मातृत्वाचे सुख अनुभवायचे होते शिवाय या एक्सीडेंटमध्ये राजनमध्ये आणि कोणकोणते फाॅल्ट निघाले आहेत हे तिला माहीत नव्हते त्यावेळेस त्या संशयाने ती त्याच्यासोबत जाऊ शकत नव्हती. तिला कोणताच निर्णय घेणे सोपे नव्हते. खरंतर या अशा परिस्थितीत मानसीच्या जागी कोणतीही स्त्री असती तरी तिला निर्णय घेणे अवघड झाले असते. तसेच मानसीला झाले होते. त्या दिवशी जेव्हा तिने राजनचे सर्व रिपोर्ट पाहिले तेव्हाच ती खूप अस्वस्थ झाली होती आणि त्यामुळेच ती तिथून परत घरी आली आणि राजनला ती कधीच भेटायला गेली नाही; पण जरी ती लग्न करणार नसली तरी एक मित्रत्वाच्या नाते तिने ठेवले असते तरीही काही बिघडले नसते. राजनला तिने आपसुकच मदत केली असती तर तो तिची ती मदत आयुष्यभर विसरला नसता; पण मानसीने तसे अजिबात केले नाही. ती स्पष्टपणे त्याच्यासोबत येण्यास नकार देत होती आणि त्यामुळेच राजनला तिचा राग येत होता. तो त्याक्षणी काहीही करू शकत नव्हता, कारण त्याचे हात दगडाखाली सापडले होते आणि अशा परिस्थितीत त्याला साथ देणारे दुसरे कोणीच नव्हते त्यामुळेच तो शांत राहिला होता.