शब्द झाले मुके 42

इकडे घरामध्ये स्वराची आणि तिच्या आजीची एकच धांदल उडाली होती की लग्नामध्ये काय करू नि काय नको. त्यांनी खूप सारी तयारी सुरू केली होती. मेघनाच्या आईची देखील काही वेगळी परिस्थिती नव्हती. मेघनाच्या लग्नात काय काय द्यायचे आणि काय काय नाही याची जणू तिने लिस्ट बनवली होती. दोन्हीकडील मंडळी खूप आनंदात होते. लग्नाच्या तयारीमध्ये गुंतले होते. तर इकडे राजन आणि मेघनाचे काही वेगळे सुरू होते. त्यांना इतक्या मोठ्याने लग्न करायचे नव्हते आणि हा निर्णय त्यांनी घरच्यांना अजून सांगितला देखील नव्हता. जेव्हा घरच्यांना ही गोष्ट समजेल तेव्हा ते तयार होतील की नाही याची जाणीवही त्यांना नव्हती. दिवसभर ऑफिसमध्ये काम करून थकून भागून ते दोघेही आपापल्या घरी गेले होते. घरामध्ये पाय टाकताच त्यांना लग्नाच्या गडबडीची जाणीव झाली. प्रत्येक जण आपापल्या तयारी मध्ये गुंतले होते. अजून लग्नाची तारीख ठरली नव्हती तर हे सगळे लग्नाच्या तयारीला लागले होते. तारीख ठरल्यानंतर काय करतात काय माहित असा प्रश्न त्या दोघांना पडला होता.