शब्द झाले मुके 43

त्यानंतर ते दोघे ज्वेलरीच्या दुकानात मेघनासाठी ज्वेलरी घेण्यासाठी गेले होते. तसेही राजनच्या आईने तिचे काही आधीचे दागिने होते ते मेघनाला देण्याचे ठरवले होते; पण तरीही काही नवीन मेघनाच्या आवडीचे दागिने तिच्यासाठी करावेत असे तिच्या आईची इच्छा होती म्हणूनच आईच्या सांगण्यावरून राजन मेघनाला तिथे घेऊन आला होता. नाहीतर त्याची अजिबात इच्छा नव्हती. तसेही ती नाटकं करत आहे आणि थोड्या दिवसांसाठीच आमच्या घरात राहणार आहे तर कशाला इतका खर्च करायचा असे त्याला वाटत होते; पण तरीही आईच्या इच्छेखातर तो हे सर्व काही करत होता. ज्वेलरीच्या दुकानामध्ये गेल्यानंतर तिथे राजनने मेघनाला जे काही आवडेल ते घेण्यास सांगितले; पण मेघनाला तिथे काही घ्यायची इच्छा नव्हती. आपण स्वतःहून इतके महागडे दागिने कसे घ्यायचे हा प्रश्न तिला पडला होता; पण तरीही तिने राजन आणि राजनच्या आईच्या इच्छेखातर एक सुंदर असे दोन वाट्यांचे मंगळसूत्र पसंत केले. ते मंगळसूत्र मेघनाला खूप आवडले असल्याने तिने तेच घ्यायचे फायनल केले आणि ती जे काही घेणार होती ते तिने राजनला दाखवले. राजनने जेव्हा त्या मंगळसूत्राकडे पाहिले तेव्हा त्यालाही ते प्रचंड आवडले. त्याला मेघनाची पसंती समजली. त्याने ते मंगळसूत्र फायनल केले.