शब्द झाले मुके 46

त्या दोघी राजनच्या घरात गेल्या. आत गेल्यानंतर पाहतात तर राजनचे घर खूप सुंदर सजवले होते आणि हॉलमध्ये सारे लग्नाचे डेकोरेशन करण्यात आले होते. तिथे भटजी देखील येऊन बसले होते. घरचेच लोक असल्यामुळे सगळेजण हॉलमध्ये जमले होते. सगळे जमले असतानाच वधू आणि वर दोघेही गायब म्हणून तिथे एकच कल्लोळ माजला होता. प्रत्येक जण तणावात होते. त्या दोघांना आता शोधायचे कसे असा प्रश्न प्रत्येकाच्या मनात घोळत होता. तरीही राजनच्या आईने ऑफिसमध्ये फोन करून राजन आल्यावर त्याला ताबडतोब माझा फोन द्यायचा असे बजावून ठेवले होते. जेव्हा ऑफिसमध्ये फोन केला तेव्हा तिला समजले की राजन ऑफिसमध्ये आला नाही. मग कुठे गेला असेल? पण काही का असेना राजन आणि मेघना दोघेही एकत्रच असतील हा मात्र विश्वास त्यांच्या मनात ठाम होता. त्यांना याची जणू खात्रीच होती; पण तरीही प्रत्येकाच्या मनात एक धाकधूक होती की या दोघांना काही झाले तर नसेल ना!