शापित मृत्यू

    
घड्याळात नऊचा ठोका पडताच राघव खडबडून जागा झाला. रोज सकाळी सहा ते रात्री आठ त्याची कामाची वेळ ठरलेली असे. कधी कधी तो उशिराही घरी येई. आज रविवार म्हणून ऑफिसला सुट्टी असल्याने तो निर्धास्त होऊन झोपला होता. पूर्ण सहा दिवस घरात बसून बसून बेजार झालेल्या तनुजाला आज बाहेर फिरायला न्यायचं अस त्याने कालच ठरवलं होतं अन् रात्री हे तनुजाला त्याने सांगितलंही होतच; त्यामुळेच ती आज पाच वाजताच उठून बसली होती. बाहेर जायचं या विचाराने बिचारी रात्री झोपलीच नव्हती. अन् सहापासून तिचा राघवच्या मागे उठ उठ म्हणून भुंगा सुरू होता.