शेवटची डिलिव्हरी...!
भाग १
" अरे यार, बस अजून एकच ऑर्डर मग आजचं ठरलेलं टार्गेट पूर्ण होईल आणि निवांत घरी जाता येईल. तरी रोज पेक्षा आज ऑर्डर मिळायला उशीरच होतोय. कोणी आज बाहेरून जेवण मागवतंय की नाही. सगळ्यांनी आज घरीच जेवण बनवलय की काय? असं असेल तर आमचे कसे होणार?"
राघव आपल्या गाडीवर बसून मनात स्वतःशीच बोलून हसला.
राघव आपल्या गाडीवर बसून मनात स्वतःशीच बोलून हसला.
त्याचे विचार चालू असताना अचानक त्याच्या फोनवर पॉपअप वाजला. रात्रीच्या सव्वा बारा वाजता त्याला त्याची शेवटची ऑर्डर मिळाली आणि त्याच्या चेहऱ्यावर हसू उमटले. त्याने ती ऑर्डर एक्सेप्ट केली आणि हेल्मेट घालून, बाईक चालू करून ऍपवर दिलेल्या हॉटेल वर जाण्यासाठी निघाला.
पुढच्या पंधरा मिनिटात तो शहरी वस्ती पासून लांब असलेल्या हॉटेलवर पोहोचला. त्या हॉटेलवर तो पहिल्यांदाच आला होता. ते तिथे आहे ह्याची त्याला माहिती देखील नव्हती आणि तसे ही त्याला ह्या नोकरीवर तीन महिनेच झाले होते.
तो शहरातून निघून पंधरा मिनिटांचा मोकळा निर्जन रस्ता पार करून तिथे पोहोचला होता. हॉटेल जवळ पोहोचून त्याला समाधान वाटले.
तिथे पोहोचल्यावर त्याला ऍपवर कस्टमरचा पत्ता समजला आणि त्याच्या कपाळावर आट्या आल्या. तो पत्ता त्या हॉटेल पासून आणखीन पुढे असलेल्या गावामधला होता. पण, आता त्याला ती डिलिव्हरी केल्या शिवाय पर्याय नव्हता. अशी ही ती शेवटचीच डिलिव्हरी होती. म्हणून ती संपवून घरीच जायचं आहे असा विचार करून त्याने हॉटेल मधून पार्सल घेतले आणि तो ऍपवर दाखवलेल्या रस्त्याने पुढे जाऊ लागला.
डिसेंबरचा महिना असल्यामुळे वातावरणात प्रचंड गारवा पसरला होता. त्यात रस्त्याच्या आजूबाजूला लोकवस्ती नसून झाडे आणि मोकळी जमीन होती. त्यामुळे थंडीचा मारा जास्तच होता. थंडी लागत असल्यामुळे तो बाईक हळू चालवू लागला.
पुढे जात असताना त्याला समोर काही अंतरावर रस्त्याच्या कडेने एक बाई चालताना दिसली. ती देखील गावाच्या दिशेने चालत होती. इतक्या रात्री ती एकटी ह्या निर्जन रस्त्यावर काय करत आहे? असा त्याला विचार आला. पण भीती पोटी तिने थांबवल्या शिवाय आपण स्वतःहून थांबायचं नाही असा त्याने विचार केला.
आणखीन पुढे गेल्यावर त्याच्या बाईकच्या आवाजाने तिने मागे वळून बघितलं आणि त्याला गाडी थांबवायला म्हणून तिने तिचा हात पुढे केला. त्याने लांबूनच बाईकच्या लाईटच्या उजेडात आधी तिला नीट बघून घेतलं. तिला बघून ती एखादी गावातील साधी बाई दिसत होती. म्हणून त्याने तिच्या जवळ जाऊन बाईक थांबवली.
क्रमशः
लेखक : चेतन सुरेश सकपाळ.
Download the app
आता वाचा ईराच्या कथा सोप्या पद्धतीने, आजच ईरा app इंस्टॉल करा