शिदोरी संस्काराची भाग ४

"मला अंदाजा आलाच. तुला माहीत नसणार. हे पुरुष असेच असतात, तुझे बाबा देखील असेच. सारं युद्ध एकट्याने लढायचे. आपण बायका कश्या असतो माहीत आहे का? बोलून मोकळं होणाऱ्या आणि हे पुरुष शांत राहून स्वतःच्या कुटूंबाला जपणारे. जावई बापू फार स्वाभिमानी आहेत बघ. मला माहित आहे तुला नंदिनीचा वाढदिवस चांगला साजरा करायचा होता; पण तसा साजरा झाला नाही. म्हणून तू नाराज होती. तू इतकी खुश नव्हती. तू त्यांच्याशी नेहमीप्रमाणे बोलत देखील नव्हती. स्नेहा, असं बालिशपणे नको वागू.
संसार हा शब्द बोलायला सोप्पा आहे; पण करायला अवघड. मला माहित आहे तुझ्या मनासारखे काही झाले नाही की तू रागावते, अबोला धरते. हे करत असताना समोरच्या व्यक्तीवर आपण अन्याय तर करत नाही ना हे तपासून बघावे. "