शॉर्टकट भाग ३ अंतिम

" मग... माझ्या चुकीमुळे बाकी सगळ्यांना नुकसान होईल. त्यांना देखील त्यांचे पैसे भेटणार नाही असं सांगितले हो त्यांनी. मला खूप गिल्ट आले त्या गोष्टीचे. बाकीच्या चार जणांनी अर्ध्या तासात त्यांचे पैसे भरले. मग तर मी अजूनच घाबरले. कारण आता फक्त माझ्या एकटी मुळे कोणालाच पैसे भेटणार नाही. काय करू काहीच समजत नव्हते मला तेव्हा. घरात मिस्टरांनी मला घर खर्चासाठी जे पैसे दिले होते ते मी पटकन जाऊन बँकेत भरले आणि ऑनलाईन त्यांना पाठवून दिले. तेवढे पैसे भरून झाल्यावर मला वाटलं सगळे पैसे परत भेटतील आणि मी लगेच एटीएम मधून पैसे काढून घरात ठेवीन. असाच विचार करून मी थोडी रिलॅक्स झालेच होते की त्यांनी पैसे पाठवण्याऐवजी अजून एक मेसेज पाठवला. अजून पैसे लागतील असे म्हणाले. तो आकडा ऐकून मी गारच पडले साहेब‌. माझे हातपाय गळाले. समजलंच नाही मी आता काय करू ते. एवढे पैसे नव्हते हो साहेब माझ्याकडे. त्यात मिस्टरांना कळालं तर... ते जीवच घेतील माझा... मी खूप विनवणी केली त्यांना की किमान आधी जे भरले होते तेवढे तरी पैसे परत द्या मला. बाकी मला काही प्रॉफिट नको. मला हे काम देखील नको. पण त्यांनी पुन्हा तेच सांगितले. 'आता हे पैसे भरा. तुम्हाला आधीचे पैसे, तुमच्या प्रॉफिट सकट हे पैसे देखील मिळतील. जो पर्यंत पुढची रक्कम भरत नाही तोपर्यंत आधीचे पैसे देखील भेटणार नाहीत. काळजी करू नका तुम्हाला तुमचे सगळे पैसे भेटतील तुम्ही आता एवढी रक्कम भरा' असा मेसेज पाठवला त्यांनी मला. मी त्यांना सांगितले माझ्याकडे खरंच पैसे नाहीत परंतु, त्यानी माझं काहीच ऐकले नाही. मी निराश झाले. मी माझ्या बहिणीला फोन केला तेव्हा तिने मला इथे यायला सांगितले. साहेब, प्लिज... मला माझे पैसे मिळवून द्या..." राधिका हात जोडून त्यांच्या समोर रडू लागली.