श्रद्धेचा विषय -श्राद्ध भाग ३

'अनेकदा आल्या गेल्या सर्वांसाठी, बाहेरून नाश्त्याला समोसे बोलवतो. सासूबाई, समोसे खात नाही मैदा असतो म्हणून, पण त्यांना आवडतो म्हणून बटाटा वडा किंवा डाळीचा वडा आणूच शकते, पण त्यांच्यासाठी वेगळा नाश्ता बोलवायचा मला कंटाळा येतो. मध्यंतरी सर्वांसाठी घरी छान जेवणाचा बेत ठरवला होता. सासूबाई पुऱ्या खात नाही. त्यांना श्रीखंडासोबत तेलाची पोळी आवडते. मी मात्र सकाळचे फुलके आहेत म्हणून, कंटाळा केला होता तेलाची पोळी बनवायचा. सकाळचा फुलका वाढला होता त्यांना ताटात. उलट पुऱ्या खायला काय होतं? म्हणून चिडचिड केली होती मी. त्या दिवशी मी सर्वांसाठी बटाट्याची भजी बनवली होती. तुमच्या सासूबाईंना कांदे भजी आवडतात, म्हणून दोन कांदे कापून भजी बनवून देण्याबद्दल रेखा सहज बोलून गेली. कांदा भजी बनवण्यासाठी, मी किती आढेवेढे घेतले होते. किंचित ही तसदी घेतली नव्हती कांदा भजी बनवण्याची.' समीक्षाला आठवलं तेव्हा तिला कसंस झालं. शरमेने तोंड कुठे लपवू असं झालं होतं तिला.