सीमंतिनी भाग ३३

सीमंतिनीला माहेरी येऊन एक महिना होऊन गेला होता आणि आता तिच्या नातेवाईकांमध्ये आणि तिच्या सोसायटीमध्ये तिच्याबद्दल कुजबूज सुरू झाली होती. लोक समोर काही बोलत नसले तरी मागे मात्र सीमंतिनी आणि तिच्या घरच्यांबद्दल चर्चा करत होते. मीराचा मात्र सीमंतिनीला पुन्हा घरात पाहून तिळपापड होत होता. सीमंतिनी अर्धा पगार घरात देत असली तरी ती पैसे तिच्या आईच्या हातात देत होती त्यामुळे प्रत्यक्षरित्या मीराच्या हातात काहीच पडत नव्हते. त्यामुळे मीराने सीमंतिनीशी पुन्हा पहिल्यासारखे वागायला सुरुवात केली होती. सकाळी लवकर न उठणे, जास्तीत जास्त काम सीमंतिनीच्या अंगावर कसे पडेल? हे पाहणे, संध्याकाळी सीमंतिनी घरी आल्यावर पुन्हा तिनेच कामं करावीत म्हणून वेगवेगळी कारणे देऊन कामातून अंग काढणे असं सगळं तिचं सुरू झालं होतं. सीमंतिनीची आई आणि सीमंतिनी प्रत्यक्ष काही बोलत नसल्या तरी त्यांना मीराचे वागणे कळत होते. तरी दोघींनी तिच्याकडे कानाडोळा केला. सीमंतिनीने भांड्याला आणि बाकी कामांना बाई लावली आणि हप्त्यावर वॉशिंगमशिन घेतली. जेणे करून तिच्या आईला कामाचा त्रास होणार नाही.