सोनचाफा 10

"हो आई, तुझे म्हणणे मला पडते; पण मला असे वाटते की अजूनही आमच्या नात्याला थोडा वेळ द्यावा. तू खूप घाई करू नकोस. आधीच पाहुण्यांनी सुद्धा डोक्याचा भुंगा करून टाकलाय. आधी तू तुझ्या तब्येतीकडे लक्ष दे. नंतर पुढचे पाहायला येईल." असे म्हणून अनिकेतने पटापट नाष्टा केला आणि तो जायला निघाला. जाताना त्याच्या मनामध्ये खूप विचार सुरू होते. तो ऑफिसला न जाता डायरेक्ट ओवीच्या घरी गेला. तिथे अनिकेत जाताच त्याचे मानपान सुरू झाले. मानपान तर होणारच ना! कारण तो त्या घरचा जावई होता; पण त्याला ही सगळी फॉर्मलिटी नको होती. त्याला त्याच्या केसचा निकाल लवकरात लवकर लावायचा होता आणि जो आरोप ओवीवर करण्यात आला होता तो पूर्णपणे पुसून काढायचा होता. यासाठीच तो प्रयत्न करत होता. त्याने तिकडच्या तिकडे सारंगलाही बोलावून घेतले होते. अनिकेत जवळच असल्याने तो पटकन जाऊन पोहोचला. सारंगला मात्र येण्यास थोडासा उशीर झाला होता. तोपर्यंत त्याचे मानपान झाले होते. सारंग आल्यानंतर त्यांच्या चौकशीसाठी सुरुवात झाली.