सोनचाफा 11

रोहन हा साधारण अठ्ठावीस ते तीस वर्षे वयो-गटातील मुलगा होता. लहानपणी त्याचे आई-बाबा वारले होते; त्यामुळे तो इकडे मामा-मामींकडे राहायला होता. तसे लहानपणापासूनच त्याचा बोलका स्वभाव होता. गल्लीतच असल्यामुळे लहानपणी तो सर्वांची मिळून मिसळून खेळायचा. पण नंतर कॉलेजला गेल्यानंतर त्याची संगत बिघडली. तो बिघडत चालला आहे हे बऱ्याच लोकांना माहित होते. तसे त्यांनी त्याच्या मामा-मामींना सांगितले देखील होते; पण त्यांनी त्याकडे दुर्लक्ष केले. तसेही पोरकं पोरं त्याच्याकडे लक्ष द्यायला कोण असणार? रोहन मात्र या सगळ्यात भरकटत गेला. तसा त्याचा स्वभाव खूप चांगला होता. सर्वांशी मदत करायचे, मिळून मिसळून रहायचे असा त्याचा स्वभाव होता; पण मित्रांच्या संगतीने तो बिघडला होता. त्याला कुणाची भीती नव्हती; शिवाय कोणाच्या अंकितात तो राहणारा नव्हता. त्याला फक्त भरपूर पैसा मिळवायचा होता. त्याला विचारणारे कुणीच नव्हते. तसेही त्याचे नातेवाईक फक्त नावाला होते, कुटुंबाचा तर पत्ताच नव्हता; त्यामुळे तो या साऱ्यामध्ये वाहवत गेला होता.