सोनचाफा 14

गौरी त्या घरात आल्यापासून ओवी तिच्याशी फक्त मोजकेच बोलत होती; मात्र अनिकेतच्या आईसोबत ती खूप गप्पा मारत होती. अनिकेतची आई जणू स्वतःचीच आई आहे असे ओवी तिच्याशी वागत होती. गौरी मात्र ओवीचे निरीक्षण करत होती. ती कशी बोलते, कशी वागते, शिवाय कुणाशी बोलते, तिला कोणाचे फोन येतात या सगळ्यावर तिचे बारीक लक्ष होते; पण त्या एका दिवसात तिला संशय यावा असे एकही गोष्ट घडली नाही. ओवीला काहीतरी खोदून विचारावे असे गौरीला खूप वाटत होते; पण नुकतीच त्यांची भेट झाली होती त्यामुळे लगेचच विचारले बरे वाटले नाही म्हणून ती शांत राहिली. उद्या परवा काही गोष्टी विचारता येतील असे तिने ठरवले होते. अनिकेत त्याचे आवरून स्वयंपाक घरात आला आणि त्याने भजीवर ताव मारायला सुरुवात केली. भजी खात असताना तो गौरीसोबत खूप गप्पा मारत होता आणि गौरी देखील मनमोकळेपणाने त्याच्यासोबत बोलत होती. त्या दोघांचे बोलणे पाहून ओवी मात्र नाराज झाली होती. अनिकेतची आई देखील अधूनमधून त्यांच्या बोलण्यामध्ये सामील होत होती. गौरी मनमोकळेपणाने खळखळून हसत होती. खूप दिवसांनी त्या घरामध्ये हसण्याचा आवाज घुमत होता ते पाहून अनिकेतच्या आईला छान वाटत होते.