सोनचाफा 17

आता लगेच त्याच्यासमोर गेलो तर तो तिथून पळ काढणार त्यापेक्षा तो काय करतो याकडे लक्ष देऊयात असे त्या दोघांनी ठरवले आणि त्याच्याकडे लक्ष देऊन होते. त्यांनी पाहिले तर रोहन आला आणि त्याने बाहेर चपला काढून घराचे कुलूप काढून तो आतमध्ये गेला. आत गेल्यानंतर त्याने आतून दरवाजा बंद केला नाही ते पाहून त्या दोघांना आयती संधी मिळाली. अनिकेत आणि सारंग दोघेही हळूच आत शिरले. आत गेल्यानंतर त्या दोघांनी पाहिले आणि त्यांचे होश उडाले. ते दोघेही पाहून चकीत झाले. आतमध्ये खूप सुंदर घराचे डेकोरेशन केले होते. बाहेरून एक झोपडी वाटणारे ते घर आतमधून आलिशान बंगल्यासारखे दिसत होते, ते पाहून त्या दोघांना खूप आश्चर्य वाटले. ते दोघेही थोडा वेळ त्या घराकडेच पाहत होते इतक्यात त्यांच्यासमोर रोहन आला. त्या दोघांची नजरानजर झाली. रोहन त्या दोघांना पाहून थोडासा घाबरला; पण आता तो जाणार कुठे? घरातून बाहेर जाण्यासाठी एकच दरवाजा होता. जरी त्याने तिथून पळून जाण्याचा प्रयत्न केला तरी ते दोघे होते. ते त्याला नक्की पकडणार हे त्याला माहीत होते म्हणून आता काय होईल ते होईल आलेल्या संकटाला सामोरे जायचे असते रोहनने ठरवले.