स्त्री जन्मा तुझी कहाणी..

मागे नवरात्रीच्या वेळीस अशीच एक पोस्ट वाचली. दांडियाला जाणाऱ्या मुलींसाठी होती. "सूनो लडकियो अपनी मर्यादामे रहो तो दुनिया औकात मे रहेगी. मातारानी को खुश करने जाना है! शहरवालोंको नही।" आणि त्याच्या सोबत मुलींचे उघडया पाठीचे फोटो. काय म्हणावे याला? .कशाचं हे नागवेपण? म्हणजे मुलींच्या वेशभूषेवरून दुनियेची औकात ठरणार तर? आणि ती फक्त मनोरंजन करण्याचं साधन ठरणार तर? ती फक्त भोगवस्तू आहे का? जर वेशभूषेवरून तिचं चारित्र्य ठरत असेल तर काय म्हणावं? आणि अशा तोकड्या कपड्यांमुळे बलात्कार होत असेल आणि तर अहो, त्या तीन वर्षाच्या निष्पाप मुलीवर अत्याचार नसता झाला हो! अगदी अंगभर कपडे असतांना सुद्धा.. हो अगदी बरोबर ऐकलंत.. तोकडे कपडे घातले काय किंवा अंगभर बुरखा घातला काय पाहणाऱ्याच्या वासनाधीन नजरा त्याला हवं तेच पाहतात. खरं तर हे नागवेपण पुरुषांच्या विचारात आहे. स्त्रीला एक भोगवस्तू म्हणून पाहणाऱ्या पुरुषांच्या पाशवी नजरेत आहे.