स्वाभिमान भाग 2

आपल्या पहिल्या भेटीपासून ते आजपर्यंतचा संपूर्ण प्रवास मला आठवतो आहे.तो प्रत्येक क्षण मी आठवणींच्या रूपात जपून ठेवला आहे.तुला जेव्हा कॉलेजमध्ये पहिल्यांदा पाहिले होते,तेव्हाच तुझे रूबाबदार व्यक्तिमत्त्व माझ्या मनात भरून गेले होते.इतरांपेक्षा तुझ्यात काहीतरी वेगळेपण हे जाणवले होते.तुझ्या देखण्या रूपाच्या मोहात तर मी पडलेच होते;पण रूपाबरोबर तुझ्यातील एकएक गुणही जसे दिसू लागले तसे माझे मन अजूनच तुझ्याकडे धावू लागले होते.
तुझी प्रगल्भ बुद्धिमत्ता व अभ्यास करण्याची आवड यामुळे तुला मिळत जाणारे यश, तुझ्या वागण्यात कडकपणा होता पण गाणे छान गायचा,प्रत्येकाला मदत करण्याचा तुझा स्वभाव,बोलण्यात तर एवढा तरबेज की समोरचा तुझ्याशी वादच घालू शकत नव्हता. विविध विषयांवरील अभ्यास व असलेल्या ज्ञानामुळे तू वेगवेगळ्या विषयांवर छान बोलायचा. तुझ्या बोलण्याची छाप इतरांवर एवढी पडत होती की, तुझा सहवास प्रत्येकाला हवाहवासा वाटत होता.अनेक मुले तर तुझे मित्र झालेच होते पण मुलीही तुझ्या आजूबाजूला कायम असायच्या.तू जेव्हा स्वतः हून मला प्रपोज केले;तेव्हा तर मला आनंदापेक्षा आश्चर्यच जास्त झाले होते.सुंदर,हुशार मुली सोडून तू मला का निवडले ? हा प्रश्न मी तुला अनेकदा विचारला;पण तू त्याचे उत्तर अजूनही दिले नाही. मी स्वतः ला खरंच खूप भाग्यवान समजत होते की, तू माझ्या जीवनाचा सहप्रवासी होणार होता.