स्वप्नसखा _ भाग १०

अनिताने असं म्हणताच अंजुचा चेहरा गोरामोरा झाला. तिने हळूच शेखरकडे पाहिलं. तो दोघींचा संवाद ऐकून गालातल्या गालात हसत होता. अंजू आणि अनिता एकमेकिंचा हात हातात घेऊन घरात गेल्या. दोन बहिणीमधील प्रेमळ संवाद तो पहिल्यांदाच ऐकत होता. त्याला खूप मजा वाटली. त्याच्या मनात आलं काकूंचा उद्या वाढदिवस आहे. त्यांना काहीतरी भेटवस्तू द्यायला हवी. त्याच्या लक्षात आलं अरे आपल्या आईचा पण उद्याच वाढदिवस. विलक्षण योगायोग आहे. आता पुढच्या वेळी घरी जाताना आईला पण साडी घेतली पाहिजे. काकूंना सकाळी साडी द्यायची असेल तर आताच काकू आणि आईसाठी पण साडी घेऊन ठेवूया. त्याच्या मनात आल्याबरोबर तो काकांना सांगून बाहेर पडला. बँकेत असल्यामुळे गावातले व्यापारी त्याच्या परिचयाचे झाले होते. त्या पैकीच एका दुकानात गेला. तो गेल्याबरोबर काउंटरवरचा मॅनेजर उठून पुढे त्याच्या स्वागताला गेला.