स्वप्नसखा _भाग २२

दुपारी चहा झाल्यावर दोघांनी निघायचं ठरवलं होतं. अंजू शेखर बरोबर जाण्यासाठी म्हणून खास वेळ घेऊन तयार झाली होती. ती मोरपिशी रंगाची सिल्कची सुंदर साडी नेसली होती. त्याच रंगाच्या बांगड्या तिने घातल्या होत्या. तिच्या मनात येत होतं आज आपल्या वेणीवर माळायला गजरा नाही. इतक्यात अनिता तिकडे आली आणि तिने तिच्या वेणीवर गजरा माळून दिला. ती सकाळी मैत्रिणीकडे म्हणून गेली होती तेव्हा तिने मोगऱ्याचे गजरे आणले होते. मोगऱ्याच्या सुगंधाने अंजूच्या चित्तवृत्ती बहरून आल्या. शेखर तयार होऊन बाहेर येऊन बसला होता. अंजू तयार होऊन बाहेर आली आणि शेखर ने तिच्याकडे नखशिखांत पाहून घेतले. अंजू खूपच स्मार्ट दिसत होती. मग ते दोघं निघाले.