स्वप्नसखा _ भाग २३ (अंतिम)

"अंजू मध्ये मी घरी जाऊन आल्यावर तू मला विचारलं होतंस मला कोणी मैत्रीण आहे की नाही. तेव्हा मी कोणी मैत्रीण नाही असं म्हटलं होतं. पण अंजू मी कॉलेज मध्ये असताना माझं एका मुलीवर प्रेम होतं. अर्थात तेव्हाही तिनेच पुढाकार घेऊन माझ्याशी मैत्री केली. मला पण ती आवडली आणि आम्ही दोघंही एकमेकांवर कधी प्रेम करू लागलो आम्हाला कळलंच नाही. तिचे वडील राजकारणात होते. तिला सुद्धा राजकारणात खूप रस होता. मला राजकारणाचा प्रचंड तिटकारा आहे. ह्या गोष्टीवरून आमचे मतभेद झाले आणि आमचे मार्ग वेगळे झाले. आता म्हणजे गेल्या तीन चार वर्षांपासून आमची काहीच गाठभेट नाही. आता गेलो होतो तेव्हा ती लग्नाची पत्रिका द्यायला आली होती. पुढच्याच महिन्यात तिचं लग्न आहे. आता हे ऐकून तुला तुझा निर्णय बदलायचा असेल तर तू बदलू शकतेस. मी तुला आता हे सांगण्याचं कारण म्हणजे उद्या तुला दुसरीकडून हे कळलं तर आपल्यात गैरसमज व्हायला नकोत."