स्वतःला शोधताना : भाग २७.

एका टेबल वर व्हिस्की, व्होडकाचे बॉटल्स मांडले होते, पेग मेजर्स आणि आईस क्युब्सचे लाकडाचे भांडे छानपैकी सजवले होते. तर दुसऱ्या बाजूला कोल्ड्रिंक्स आणि पाणी ठेवले होते. व्हेज चाखणा आणि नॉनव्हेज चाखणा वेगवेगळेच ठेवलेले होते. बिअर पिणाऱ्यांसाठी बाटल्या आणि कॅन्स फ्रिजमध्ये सजवलेले होते. पार्टीची इतकी अप्रतिम मांडणी पाहून सगळेच चकित झाले होते. त्यातील कित्येकांनी हॉटेलातील पार्टीचा वाईट अनुभव घेतलेला होता तर काहींनी मित्रांच्या घरी केलेल्या ओल्या पार्टीची दुरावस्था पाहिलेली होती. परंतु किरणने चोख आणि मुक्त हस्ते केलेले आदरातिथ्य डोळ्यात भरणारे होते. कोणालाही कुठेच आणि कसलीच कमतरता पडत नव्हती.