तेलाची पोळी (भाग २)

“हो. अगं लहानपणापासून बघतोय, आईच सगळा स्वयंपाक करते. माझी आई ह्या घरची मोठी सून आहे ना, सगळं जबाबदारीनं पार पाडलं तिनं. आजी गेली तरी तिने ही प्रथा काही बंद केली नाही. आणि तू बघ, देवच तुला शक्ती देईल सगळं करायची. तुला सांगू एवढी मजा येते गं. काका-काकू, मामा-मामी, गावातली ओळखीची जवळची माणसं सगळा गोतावळा जमतो. आम्ही मुलं तर इतकी मज्जा करतो ना! तू बघशील ना आता ह्यावेळी. धम्माल नुसती! गणपतीचे दोन दिवस कसे जातात काही कळत नाही. अमू, आम्ही तर रात्री झोपतही नाहीत. मस्त गप्पाटप्पा सुरू असतात. मध्ये मध्ये गेमही खेळतो. रात्री भूक लागली की आम्हाला खायला म्हणून आई आधीच शेव चिवडा वगैरे बनवून ठेवते. दिवाळीतही येत नसेल इतकी मजा येते.” अनिकेत उत्साहात सांगत होता. अमृताला मात्र चाळीस लोकांच्या स्वयंपाकाचे टेंशन आले होते.