तेरा मेरा साथ रहे भाग-६

"आरं, अभि काय झालं, सोन्या? रडतोस का?" ते त्याच्या दंडाला पकडून त्याला बाजू करू पाहत होते. पण तो मात्र काहीच न बोलता त्यांना घट्ट मिठी मारून ओक्साबोक्सी रडू लागला. वयाने जरी लहान असला तरी तो खूपच समजदार होता. त्याला परिस्थितीची जाणीव होती म्हणून तो कसे असेल तसे राहायचा. कधी कोणत्या गोष्टींसाठी हट्ट करत नसायचा. त्यामुळे केशवला त्याचं खूपच कौतुक वाटायचे. आपल्या मुलाला हर तऱ्हेचे सुख देण्याचा त्यांचा आटापिटा असायचा. आपले आजारपण जर कळलं तर त्याचे अभ्यासात लक्ष लागणार नाही, हे ते जाणून होते म्हणून त्यांनी याबद्दल त्याला काहीच सांगितले नाही.