शीर्षक : स्वभावाचे सौंदर्य, खऱ्या सौंदर्याची ओळख
आजच्या काळात “सौंदर्य” या शब्दाला एक वेगळंच महत्त्व दिलं गेलं आहे. चेहऱ्यावरच्या आकर्षकतेला, नितळ त्वचेला, स्टाईलिश कपड्यांना आणि फोटोंमध्ये दिसणाऱ्या परिपूर्णतेला आपण सौंदर्याचं मापदंड मानायला लागलो आहोत. पण खऱ्या अर्थाने सौंदर्य हे दिसण्यात नसून असण्यात असतं. कारण दिसणं क्षणिक असतं, पण स्वभाव ही गोष्ट माणसाला आयुष्यभर सुंदर बनवते.
एखाद्या व्यक्तीचं बोलणं, वागणं, इतरांविषयीची भावना, संवेदनशीलता या गोष्टी त्याच्या स्वभावाचं सौंदर्य दाखवतात. आपण अनेकदा पाहतो काही लोक चेहऱ्याने अत्यंत साधे असतात, पण त्यांचं व्यक्तिमत्त्व इतकं प्रभावी असतं की त्यांच्या सहवासात आपण आनंदी होतो. त्यांच्या चेहऱ्यावरचं हास्य, त्यांच्या वागण्यातली नम्रता आणि त्यांच्या शब्दांतला प्रेमभाव हेच त्यांचं खरं सौंदर्य असतं.
सौंदर्य म्हणजे केवळ चेहऱ्यावरचं तेज नाही, तर मनातली प्रामाणिकता, संवेदनशीलता आणि दयाळूपणा हे त्याचं मूळ आहे. माणूस जेव्हा स्वतःकडे आणि इतरांकडे प्रेमाने बघायला शिकतो, तेव्हा त्याच्या अंतःकरणातून अशी ऊर्जा प्रकट होते की त्याचं सौंदर्य कोणत्याही बाह्य अलंकाराशिवायही उजळून दिसतं.
जगात सौंदर्य क्षणिक आहे आज आहे, उद्या नाही. पण स्वभाव ही कायमची ओळख आहे. म्हणूनच म्हणतात, “सौंदर्याची कमतरता चांगला स्वभाव नक्की पूर्ण करतो, पण स्वभावाच्या कमतरतेला सौंदर्य कधीच पूर्ण करू शकत नाही.” कारण सुंदर चेहरा काही काळ मन मोहवतो, पण सुंदर स्वभाव मन जिंकतो आणि कायमचा ठसा उमटवतो.
एखादं गोड बोलणं, मदतीचा एक हात, दुसऱ्याच्या भावना समजून घेणं या छोट्या गोष्टी सौंदर्याला अधिक अर्थ देतात. माणूस कितीही सुंदर असो, जर त्याच्या वागण्यात अहंकार असेल, जर तो इतरांना कमी लेखत असेल, तर त्याचं सौंदर्य निरर्थक ठरतं. पण एखादी व्यक्ती चेहऱ्याने साधी असली तरी तिचं मन निर्मळ असेल, तर ती जिथे जाईल तिथे आपुलकीचा प्रकाश पसरवते.
खरं सौंदर्य म्हणजे स्वभावाचं तेज. ते वेळेनुसार वाढतं, वयानुसार अधिक सुंदर होतं. बाह्य सौंदर्य काळानुसार मंदावू शकतं, पण स्वभावाचं सौंदर्य दिवसेंदिवस अधिक झळाळतं. जसं चांगल्या वृक्षाची सावली वाढत जाते, तसंच चांगल्या स्वभावाचं सौंदर्यही लोकांच्या मनात स्थिरावतं.
म्हणूनच आयुष्यात आपण आरशातलं सौंदर्य नव्हे, तर मनातलं सौंदर्य घडवू या. चांगले विचार, चांगल्या भावना, आणि प्रामाणिक वर्तन हीच खरी सौंदर्यप्रसाधने आहेत जी कधीही फिकट होत नाहीत.
सौंदर्य दिसण्यावर नाही, असण्यावर असतं.
आणि असणं म्हणजे प्रेम, नम्रता, आणि मनाची निर्मळता.
हीच खरी ओळख, हेच खरं सौंदर्य… जे काळालाही पराभूत करू शकतं.
आणि असणं म्हणजे प्रेम, नम्रता, आणि मनाची निर्मळता.
हीच खरी ओळख, हेच खरं सौंदर्य… जे काळालाही पराभूत करू शकतं.
©® सचिन कमल गणपतराव मुळे...
परभणी, ९७६७३२३३१५
परभणी, ९७६७३२३३१५
Download the app
आता वाचा ईराच्या कथा सोप्या पद्धतीने, आजच ईरा app इंस्टॉल करा