परिवर्तन भाग-२

"त्यासाठी इथे राहून तुला ते माहिती करून घ्यायला हवे. हे बघ तू पण एकुलती एक मुलगी आहेस मी पण एकुलता एक मुलगा आहे. तुला सर्वच येत असावे हे मी कधी गृहीत धरले नाही पण तू प्रयत्न तर करू शकते. लग्न झाल्यापासून तू माहेरी किती वेळा गेलीस? माझा डब्बा तर आईच करून देते. तुला कधी असे वाटले नाही का, आपण पण सकाळी उठून आई कशी करते ते पाहून करण्याचा प्रयत्न करावा. तू आई खूप आजारी आहेस म्हणून गेली होतीस पण दुसऱ्या दिवशी तर तू चित्रपट पाहायला गेलीस. आता ह्यातले किती खरे आणि किती खोटे? सांग बरं. तू तुझे माहेर सोड असे म्हणत नाहीये पण आईसोबत बसून तू काही गोष्टी तुला ज्या येत नाहीत त्या जाणून घेण्याचा प्रयत्न केला आहेस का? टीव्ही एकदा बघत बसलीस की तू काम बाजूला ठेवतेस. जसे तुझ्या आईचे वय झाले तसे माझ्या आईचे पण झाले आहे. तिने काय आयुष्यभर माझेच करायचे का?" त्याने आज सर्व बोलून दाखवले.