झोपडी भाग ४

चहा पिऊन झाल्यावर निशाने कपबशा विसळून जागेवर ठेवल्या. डबे त्यांच्या जागेवर ठेवून दिले. मग ती त्या खाटेकडे येऊ लागली. खाटेवर प्रदीपच्या मागे तिची काहीतरी वस्तू असावी. प्रदीपच्या जवळ येताच त्याच्या पायाला अडखळून तिचा तोल गेला. ती त्याच्या अंगावरच पडली. प्रदीपने हेही जाणून बुजून केल होत. दोघांची नजरानजर झाली, अन् तिने लाजून मान वळवली. त्याला त्याच्या प्रश्नाचं उत्तर मिळाल होत. तो मनोमन सुखावला. त्याने तिची हनुवटी बोटांच्या चिमटीत पकडून तिचं मुख स्वतःकडे केलं. त्याचा हात बाजूला सारून ती उठली. घाईने खोलीकडे पळाली. जरावेळ दाराच्या चौकटीत थांबून अर्धवट मागे पाहिलं. मग ती आत गेली. प्रदीप झटकन उठून तिच्या मागोमाग खोलीत शिरला.
निशा एका कोपऱ्यात भिंतीला टेकून उभी होती. तो तिच्याजवळ आला. तिचं हृदय धडधडू लागलं. डोळ्यांत निराळीच चमक आली. तिचे दोन्ही कोपर घट्ट पकडून त्याने तोंड तिच्या चेहऱ्यावर झुकवलं. क्षणभर तो भान हरवून गेला. तोच तिनं धक्का देऊन त्याला मागे लोटलं. जवळच कोपऱ्यात एक जाडजूड दोर पडला होता. तो उचलून सरकत सरकत ती भिंतीतल्याच खिडकीपाशी गेली. तो जवळ येताच त्याला तिनं खिडकीला पाठ टेकून उभ केल. खिडकीच्या एका गजात तो दोर अडकवून दोन्ही बाजूने त्याचे हात बांधले, आणि त्याला घट्ट मिठी मारली. तिच्या नाजुक स्पर्शाने सुखावून त्याने डोळे बंद केले. हळूहळू तिच्या हातांची पाठीवरची पकड घट्ट होऊ लागली.