द डी.एन्.ए. (भाग -५)

नाही म्हणली तरी बरीच गर्दी तिथे होती. रिपोर्टर तर बॉडी आणायच्या आधीपासून तिथे येऊन थांबले होते. जयश्री आणि डॉ. विद्यावर्धन "आपला मुलगा जिवंत आहे त्याची बॉडी येणारच नाही." असंच म्हणत होते आणि अचानक बॉडी आलेली पाहून विद्यावर्धन तिथेच कोसळले. कोणाला काही कळायच्या आतच त्यांनी हे जग सोडलं होतं. एकाच वेळी मुलगा आणि नवऱ्याचं प्रेत समोर बघून जयश्री एकदम तुटून गेली आणि तिथेच नुसती एकटक बघत बसली. डॉ. विद्यावर्धन यांचे सह वैज्ञानिक आणि शेजारी तिला सावरायला जात होते पण तिला जगाचं भानच उरलं नव्हतं. तिच्या डोळ्यातून पाण्याचा एकही थेंब येत नव्हता आणि आपल्या आजूबाजूला काही घडतंय हे सुध्दा तिला जाणवत नव्हतं. सगळे रिपोर्टर तिला बोलतं करायचा प्रयत्न करत होते पण सगळं व्यर्थ जात होतं. शेवटी डॉ. विद्यावर्धन आणि त्यांच्या मुलाचे अंतिम संस्कार त्यांच्या सह वैज्ञानिकांनी केले. एवढं घडून गेलं तरीही जयश्री अजून भानावर नव्हती.