द डी.एन्.ए. पर्व २ (भाग -३)

कोणी काही बोलणार किंवा काही लक्षात येणार त्याच्या आधीच तो डायनासोर वाऱ्याच्या वेगाने मागे येऊ लागला. अंधारात त्याचे चमकणारे हिरवे डोळे अजूनच भयानक दिसत होते. नेमकी डायनासोरची दिशा आणि सी.आय.डी. लपून बसलेली दिशा एकच होती. आता काही खरं नाही असंच सगळ्यांना वाटत होतं. तो डायनासोर ज्या आवेशात तिथे आला होता हे पाहता आपण बहुदा आज शिकार होणारच असंच सगळ्यांना वाटत होतं. काही क्षण असेच गेले. अचानक किंचाळण्याच्या आवाजाने टीमने आजूबाजूला बघितलं. त्या डायनासोरने रॉबर्टलाच हातात उचलून धरलं होतं. सगळे आश्चर्याने बघत होते. रॉबर्ट जिवाच्या आकांताने ओरडत होता पण लगेचच त्या डायनासोरने त्याला खाली सोडलं. मागून त्याचा रिमोट कंट्रोल घेऊन ती लोकं पुन्हा तिथे आली.