द हनीट्रॅप ( भाग १ ला)

गावापासून दूर शहरात राहायची ही तिची पहिलीच वेळ नव्हती. याआधीही शिक्षणासाठी मग नोकरीसाठीही ती दुसऱ्या शहरात एकटी राहिली होती. दरम्यान या नामांकित कंपनीत चांगल्या पगाराची नोकरी मिळाली आणि ती इकडे शिफ्ट झाली.
ढगांच्या गडगडाटाने पावसाच्या आगमनावर शिक्कामोर्तब केला आणि आभाळाचा हात सोडून इवलेसे पावसाचे थेंब धरणीकडे सरसावले. त्यांना कवेत घेत धरणीही तृप्त झाली. त्यांच्या मिलनाचा सुगंध आसमंतात उधळला. विभाला पहिल्या पावसात दरवळलेला मातीचा तो सुवास भारी प्रिय. डोळे बंद करत, दीर्घश्वास घेत तिने तो सुवास अंतरात भरून घेतला.
तोच दारावरची बेल वाजली आणि तिची तंद्री सुटली.
बाल्कनीतून घरात येत तिने दरवाजा उघडला. मोजक्या किराणा सामानाची डिलिव्हरी घेऊन डिलिव्हरी बॉय आला होता.लिस्ट चाळत ती सामानाची खात्री करून घेऊ लागली.