द वेडिंग सीझन- भाग 11

"नको. मला आता अजिबात वेळ नाहीय. त्या तुमच्या मैत्रिणी तिथे ओळीने उभ्या आहेत. तुमचं बघून त्यांना साडी नेसायची तीव्र इच्छा झालीय. माझी नवीन असिस्टंट त्यांचं आवरता, आवरता किती थकली आहे बघा. माझंही आवरायचं बाकी आहे अजून. शिवाय आपल्याला वेळेत पोहोचायचं आहे ना? की वरात इथेच बोलावू? त्यातल्या त्यात एक बरं म्हणजे लग्नाचं ठिकाण अगदी जवळ आहे." मिंटीच्या बोलण्याने सगळेच हसायला लागले.
तिच्या हातात मेकअपचं साहित्य होतं. ओठांत तीन -चार पिना धरून ठेवलेल्या होत्या. त्यातून ती कशीबशी बोलत होती. केसांत दोन कंगवे अडकवले होते. जीन्सच्या खिशात थोडं साहित्य होतं. "माझं काम काय? आणि मला काय करायला लागतंय देवा?" मिंटी पुरती वैतागली होती.