थोरल्या सूनबाई - ३

नमिता एक एक करून दिवाळीचं फराळ बनवत होती. दुपारची सगळी कामं करून जो मधला वेळ मिळेल त्यात ती हळूहळू सगळं करायचा प्रयत्न करत होती. सगळ्यांच्या आवडीनिवडी लक्षात घेऊन करत होती. सासऱ्यांना चावता येत नाही; म्हणून करंजी अगदी खुसखुशीत बनवली. दिराने सांगितले ते सर्व पदार्थ बनवले. नवऱ्याच आवडतं विशेष अस काही नव्हतं, जे बनवलं ते खायचं असं होतं. तरीही विनायकला मात्र आपण आपल्या बायकोचं कौतुक करावं हे कधी वाटतं नव्हतं. नवऱ्याचा स्वभाव हा असा आणि दिराचा स्वभाव अगदी विरुद्ध. प्रितीने काहीही केलं तरी तो तिचं इतकं कौतुक करायचा की बस.. अशाने प्रिती आणखीनच हरखून जायची आणि मुद्दाम शायनिंग मारत चालायची.