ती आणि तिचं कुटुंब - भाग 45

आई (मालती) -" मी इतके वर्ष नवऱ्याला आवडेल तसे केले. त्यांना भाजी - पोळी लागते आवडीची. दोन्हीही वेळेला गरम, ताजी, वेळेतच जेवायला लागत. इतके वर्ष खूप सांभाळत आले. त्याचा स्वभावच आहे. कधीही चांगल म्हणत नाही. खूप चुका काढून नाव ठेऊनच खातात.मी प्रयत्न सोडले नाही. त्यांनी नाव ठेवणं सोडले नाही. पण हि करते हि जाणीव असते कुठे तरी. बोलून दाखवत नाही. समजतं ते. तुला समजले का मी काय बोलते? आता हि लाल भोपळ्याची भाजी याला मेथीच्या दाण्याची फोडणी लागते. मेथीचे दाणे कमी नको, जास्त नको. लाल भोपळ्याच्या फोडी लहान चालत नाही. भोपळ्याच्या फोडी फारच गाळ शिजलेल्या चालत नाही. कच्या राहिलेल्या चालत नाही. भोपळ्याच्या भाजीत गूळ लागतो. शुगर मुळे जास्त चालत नाही. कमी पडला तर चव लागत नाही म्हणून कमी चालत नाही. हे सगळे लक्षात ठेऊन भाजी करते. काही ना काही चुका काढतातच. नाव ठेऊन खातात. मी करणारी भली ते नाव ठेवणारे भले.. "