तिचा न्याय ( भाग एक )

शाळेच्या समोर एक किलोमीटर पर्यंत एकच सरळ डांबरी रस्ता होता. तो रस्ता संपे पर्यंत बरीच गर्दी राहात असे. तो रस्ता संपला की तेथून त्या रस्त्याला तीन फाटे फुटत. एक रस्ता सरळ एस्टी स्टँडवर जाई. एक गावात जात असे आणि एक कच्चा रस्ता पिंपळाच्या पाराला वळसा घालुन नदीच्या कोरड्या पात्रातून रानातल्या तिच्या घराकडे जात असे. या रस्त्याचा वापर गावातले लोक फार कमी वेळा करतं. म्हणजे कधी कधी नदीच्या काठाचा स्मशान म्हणून उपयोग करत. त्याच वेळी त्या रस्त्यावर गडबड दिसे. दोन तीन दिवस माणसांची वर्दळ दिसत असे. नंतर पूर्ण शांतता असे. नदी ओलांडून थोडया अंतरावर काही दाट झाडी होती. आणि त्या पलीकडे तिचं घर होतं. तिच्या घराच्या आसपास दूरवर तुरळक वस्ती होती.