तिची सल भाग १४

"कावेरी, आमच्याकडे एक रेडिओ होता. बाबांना सवय होती सकाळची सुरवात छान गाणी ऐकून करायचे. हे गाणं बाबांचे आवडते गाणं होतं. हे गाणं लागलं की, बाबा रेडिओ अगदी कानाजवळ घेऊन ऐकत बसायचे. तल्लीन व्हायचे. मला म्हणायचे. सुमी ह्या गाण्यात वेगळीच आर्ततात आहे. अर्थपूर्ण गाणं आहे हे. मनाला मोहित करतं हे सुमधुर गीत. वेगळीच ताकद आहे. कधी कधी बाबांच्या डोळ्यात पाणी यायचे. माझे बाबा फार हळवे होते कावेरी. मी थोरली होते. माझ्यावर त्यांचा जास्तच जीव होता.
माझं कौतुक करायला थकायचे नाही.
बाबा मला म्हणायचे, राजहंसाला सगळेच चिडवायचे. सगळे बदक एक सारखे दिसायचे आणि तो एकटा वेगळा. सर्वांहून निराळे. नंतर त्याला कळतं की तो राजहंस आहे, त्याचे भय पळून जायचे. बाबा म्हणायचे सुमी आपल्या प्रत्येकात वेगळे गुण असतात, कोणी कितीही नावं ठेवली, चिडवलं तरीदेखील आपण आपली क्षमता ओळखायची आणि पुढे जायचे. "