तिची तपश्चर्या - भाग - २३

"उमा आपल्या घरची हळद लावून झाली आहे आता मानसच्या घरची त्याची उष्टी हळद तुला लावायची आहे. मला माहितीये तुला त्या हळदीची गोडी जरा जास्तच असेल." जमलेल्या सगळ्याजणी खुदुखुदू हसायला लागल्या. उमाच्या डोळ्यासमोर मानसच तिला स्पर्श करतोय असे दृश्य दिसू लागले. उमाच्या मनात आलं मानसच्या घरी पण हे सर्व विधी चालू असतील. त्याला आता काय वाटत असेल. या सर्वाला तो कसा सामोरा जात असेल. त्याच्यासाठी पण हे एक दिव्यच असेल नाही का. आज आपल्या जागी नंदिनीशी मानसचं लग्न झालं असतं तर त्याने सुद्धा हे सर्व किती आनंदाने करून घेतलं असतं. त्याला तिची प्रकर्षाने आठवण येत असेल का! आपल्यासारखाच तो सुद्धा कोणाजवळ त्याच्या मनातल्या ह्या भावना सांगू शकत नाही. अशी तडजोडीने लग्न होतात तेव्हा ती कितपत यशस्वी होत असतील. देवच जाणे! पण समाजात असे कितीतरी संसार असतात जे त्यांच्या संसारात खुश नसतात. काही जोडप्यांमध्ये कालांतराने प्रेम निर्माण होऊ शकतं किंवा ते एकमेकांना समजून घेतात म्हणून त्यांचा संसार लौकिकार्थाने यशस्वी होतो. उमा मनोमन देवाला प्रार्थना करते आपल्या बाबतीत सारं व्यवस्थित होऊ दे.