तिची तपश्चर्या - भाग २६

इथे उमा मात्र नव्याने तयार व्हायला खूपच उत्सुक होती. तिला रिसेप्शन साठी घेतलेला शालू खूपच आवडला होता. जांभळ्या रंगावर सुंदर नाजूक सोनेरी नक्षी. पदरावरचा मोर तर खूपच भारी होता. लहानपणापासून म्हटलेलं गाणं‌ 'पदरावरती जरतारीचा मोर नाचरा हवा' आता सत्यात उतरत होतं. उमा, तिच्या मैत्रिणी आणि राधाताई तिला तयार व्हायला मदत करण्यासाठी तिच्या रूममध्ये आल्या. सुलभाची मेकअप करण्याची पद्धत खूपच छान होती. ती कधीच भडक मेकअप करायची नाही. तसं पण उमाला मेकअपची खरंतर आवश्यकताच नव्हती. पण तिचा खास दिवस होता ना म्हणून सुलभाने तिला हलका मेकअप केला. शालू खूपच सुंदर रीतीने नेसवला. उमाच्या सरळ रेशमी लांब केसांची हेअर स्टाईल करायला सुलभाला भारी आवडायचं. ती तिची तयारी करत असताना इतर मैत्रिणी आवश्यक असे सल्ले देत होत्या. त्याप्रमाणे सुलभा त्यात फेरफार करत होती.