तिची तपश्चर्या - भाग २७

मानस पण झोपायचा प्रयत्न करत होता परंतु त्याला सुद्धा झोप येत नव्हती. त्याच्या मनात येत होतं उमाचं आपल्याबद्दल काय मत झालं असेल. लग्न झाल्यानंतर नव्या नवरीच्या किती हळव्या भावना असतात. आपण तिला आपलं मत सांगितलं आहे तरी ती सर्वच विधींमध्ये किती उत्साहाने भाग घेत होती. तीला सांभाळून घेणं आपलं कर्तव्यच आहे. आईवर तीने खूप छान छाप पाडली आहे. उमाच्या माहेरची परिस्थिती बेताचीच आहे. तिने गावाबाहेरचं जग सुद्धा पाहिलं नाही. तिला सारी ऐहिक सुखं देण्याचा आपण प्रयत्न करायलाच हवा. त्यादिवशी आई विचारत होती उमाला घेऊन कुठे बाहेर फिरायला जाणार आहेस? उमाला कुठे जायचंय हे विचारूनच आपण ठरवायला हवं. उमाला सगळ्याची हौस आहे,फिरायची आवड आहे. अजून दोन दिवस तरी घरी सर्व पाहुणे असतील. लग्न सोहळा व्यवस्थित पार पडला तसंच सगळं व्हायला हवं. विचारांच्या आवर्तनात मानसला पण झोप लागली.