तिची तपश्चर्या - भाग ४१

मानसचा पुस्तक संग्रह खूप उच्च दर्जाचा होता. ऐतिहासिक, सामाजिक सर्वच प्रकारचे साहित्य त्याच्या संग्रही होते. तिने सामाजिक पुस्तकांचा कप्पा उघडला. बहुतांश तिच्या आवडीचेच लेखक होते. तिला आश्चर्य वाटलं. वाचनाच्या बाबतीतील आपली आवड एकच आहे. त्यातली काही पुस्तके तिने वाचली होती तर काही तिच्यासाठी नवीन होती. आपला वेळ वाचनात खूप छान जाईल. तिच्यासाठी नवीन असलेले 'जीवनाची कसोटी' पुस्तक तिने उघडून पाहिले. अशीच पानं उलटताना तिला एक फुलस्केप पेपर दिसला. उघडल्यावर तिच्या लक्षात आलं की मानसने नंदिनीला लिहिलेलं ते पत्र होतं. दुसऱ्याची पत्रं वाचायची नाही असं म्हणून लगेच तिने ते बंद करून तसंच ठेवलं. मानस आणि नंदिनी नियमित भेटत होते तर त्याला तिला पत्र लिहायची गरज का भासली असेल. किंवा हे पत्र त्याने त्याचे प्रेम व्यक्त करण्याआधीच लिहिलेलं असावं. मानस आणि नंदिनी दोघेही एकाच ग्रुप मध्ये होते. त्यांची सर्वांचीच खूप चांगली मैत्री होते. त्यांना ग्रुप मध्ये असताना एकमेकांशी स्वतंत्रपणे बोलायला वेळ आणि संधी मिळत नव्हती. म्हणूनच कदाचित मानसने नंदिनीला पत्र लिहिलं असावं इतक्यात आईंनी तिला हाक मारली आणि ती खाली गेली.