तिची तपश्चर्या भाग ५३

पण नंदिनीने काही निर्णय घेतला तरी आपण आता
उमाला सोडू शकत नाही ही जाणीव त्याला प्रकर्षाने झाली होती. नाही म्हटलं तरी उमाने त्याच्या मनात आता घर केलं होतं.  तिच्या वागण्याने तिने मानसचे मन जिंकलं होतं. घरातल्याही सर्वांची मन जिंकून घेतली होती.  इतक्यात जयंत सुद्धा घरात आला.  त्याने ह्या दोघांना पाहिलं तेव्हा त्याच्या लक्षात आलं की हा बहुदा मानस असावा.  मानसला बघितल्यावर त्याच्या काळजात चर्र झालं.  नंदिनीने आपल्याला होकार दिला आहे ती तिचा निर्णय बदलणार तर नाही.  जुनं प्रेम अगदी हाताच्या अंतरावर असताना ती आपला स्वीकार करेल का? उमाने जेव्हा जयंतला पाहिले आणि तिला कळलं की हेच डॉक्टर जयंत तेव्हा तिच्या मनात आलं हे तर किती देखणे आहेत.  नंदिनीने यांच्याशी लग्न करावं ना.  आता आपलं लग्न झालंय हे नंदिनीने स्वीकारून ह्या जयंतशी लग्नाला तयार व्हावं.  अरे पण हे आपण म्हणतोय पण त्या
जयंतचे लग्न झालं आहे किंवा त्याचं इतर कोणावर प्रेम आहे हे आपल्याला काहीच माहित नाही.  पण उमाला राहून राहून वाटत होतं की आता आपण मानसशिवाय जगू शकणार नाही.  मानस, जेव्हा तो तिला बघायला आला होता तेव्हाच तिला तो खूप आवडला होता आणि त्यानंतर ती त्याच्यावर मनापासून प्रेम करू लागली होती.