तिची तपश्चर्या भाग ५६

"असेलही कदाचित.  मी जपान बद्दलची माहिती एका पुस्तकात वाचली होती.  तिथे 'चेरी ब्लॉसम' म्हणून एक सीजन असतो.  तेव्हा सकुरा नावाची फुलं खूप बहरून येतात.  तेथील लोक सकुराने बहरलेल्या अशा झाडाखाली मुद्दामहून जेवायला जातात.  अगदी उत्सवाप्रमाणे तो सीजन साजरा होतो.  तिथे खूप आकर्षक, सुंदर रोषणाई केलेली असते. तिथे लोकांची अशी समजूत आहे की त्या सकुरा झाडाखाली बसून जेवताना जर आपल्या अंगावर त्या फुलांचा वर्षाव झाला तर आपल्या जीवनातील आनंद द्विगुणीत होतो.  त्या फुलांपासून तेथे आईस्क्रीम बनवले जाते, मिठाई बनवली जाते.  तिथे त्या फुलांचं वारेमाप कौतुक केलं जातं अगदी मनापासून.  इथे आपल्याकडे फक्त कवितातूनच गुलमोहराचे वर्णन आणि कौतुक होताना दिसते. बाकी लोकांना गुलमोहर बहरला काय किंवा तसाच राहिला काय काही फरक पडत नाही."