तो आणि तो

"ऋत्विज तुझा गुन्हेगार मी आहे, अयन नाही. तो शेवटपर्यंत प्रयत्न करत होता; पण मी त्याला आपल्या दोघांपैकी एकाला निवडायला सांगितलं. मला माहीत होतं की त्याला माझ्या कष्टांची जाणीव आहे म्हणून त्याचा नाईलाज होईल व तो तुझ्याशी नातं तोडेल आणि झालंही तसंच. तू जेवढ्या यातना सहन केल्या तेवढ्याच त्यानेही सहन केल्या. दिवसा तो स्वतःला कामात गुंतवून ठेवायचा आणि रात्री तुझ्या आठवणीत झुरायचा. तुझ्याशी नातं तोडायला त्याला मी भाग पाडलं होतं हेदेखील त्याने तुला सांगितलं नसेल. मी तुझी माफी मागतो पण तू त्याला एकटं सोडू नकोस. तुझा राग स्वाभाविक आहे; पण तो त्याच्यावर नव्हे तर माझ्यावर काढ. हवी ती शिक्षा दे तू मला पण त्याची साथ सोडू नकोस. खूप खचला आहे तो... तुझ्याविना रूक्ष आहे त्याचं आयुष्य; म्हणून तू पाठ फिरवू नकोस. त्याचा आनंद तू आहेस म्हणून त्याच्या सुखाची मी तुला भीक मागतो. त्याला एकदा संधी दे, तो परत कधीच तुला निराश करणार नाही." आदर्शरावांनी रडतच हात जोडले.