तो, ती आणि... ते? | भाग ५

तिने प्रश्न विचारल्यावर काही वेळ तसाच शांततेत गेल्यावर  समोरून तिला एक घोगरा आवाज ऐकू येऊ लागला,
" मी कुठे नव्हतो गेलो नलू.. अगदी शेवटच्या श्वासा पर्यंत तुझी वाट पाहिली, पण तू कधीच परत आली नाहीस. तुझ्या विरहात मी इतका बुडालो की, गावच्या नदीत बुडून माझा जीव गेला तरी मला समजलं नाही. मारून देखील हा विरह दूर नाही झाला. तेव्हा मग तू गाव सोडून जाताना मी तुला दिलेल्या ह्या रातराणीच्या सुगंधाने मला तुझ्या जवळ बोलवून घेतले. मी तुझ्या जवळ ओढला गेलो. मी त्या झाडावरच राहून तुला पाहू लागलो. तुझा स्पर्श अनुभवू लागलो, पण नंतर लग्न करून मला इथे घेऊन आलीस. तेव्हा मला तो तुझ्या सोबत असल्याचं बघवलं नाही. तुम्हाला एकत्र बघून माझ्या जीवाची आग आग होते आणि म्हणून आता मी त्याला जिवंत सोडणार नाही तू फक्त माझी आहेस. अजून कोणालाच मी तुझ्या जवळ येऊ देणार नाही."