तोच चंद्रमा नभात - भाग २

लग्नानंतर नव्याचे नऊ दिवस असे भुर्रकन उडून गेले आणि दोघेही आपापल्या कामाला जुंपले. हल्ली दोघांची एकमेकांवर चिडचिड होऊ लागली. रोज तेच तेच करून त्यांना कंटाळा यायला लागला. ऑफिसचे काम मग घरी आल्यावर घरातले कामं. दोघेही अक्षरशः वैतागून जायचे. संध्याकाळी घरी येताना भाजी घ्यायची तर कधी वडापाव खाऊन घरी आल्यावर दोघेही तसेच झोपून जायचे. घरच्यांना पण त्यांच्याबद्दल फार सहानुभूती वाटायची. इतक्या कमी वयात त्यांनी बरेच काही करून दाखवले होते. कधी कधी होणारी लुटूपुटूची भांडणं दोघांच्या घरापर्यंत पोहोचत होती. त्यांनीही कुठेतरी फिरून या, एकमेकांना जरा वेळ द्या म्हणून सांगितले होते. लग्न झाल्या झाल्या संसाराला लागलेल्या त्या दोघांना थोडा निवांतपणा हा पाहिजेच होता.