तु असा जवळी रहा ( भाग ५४ वा)

" आम्ही वेगळं होण्यासाठीच एकत्र आलो होतो. नियतीने आमच्या नात्यासाठी हेच ठरवलं असणार नाहीतर असं अचानक सगळच संपलं नसतं. तु आमच्यामध्ये आधीही नव्हताच आणि आताही नाहीस. आमचं एकमेकांवरचं प्रेम तेव्हाही अबाधित होतं किंबहुना नेहमीच राहिल . जुनं प्रेम हृदयाच्या गाभाऱ्यात जपत मी मात्र तुझ्या प्रेमात पडले. माझ्या बाबतीत खरं प्रेम एकदा न होता त्याची पुनरावृत्ती झाली. नशिबवान समजते मी स्वतःला की माझ्या आयुष्यात तु आलास. प्रेमाची नवी परिभाषा शिकवणारा तुझा सहवास मला तुझ्या प्रेमात पडण्यासाठी विवश करून गेला. जुन्या आठवणींच्या कातरवेळी तु आशेचा मिणमिणता दिवा झालास आणि अंर्तमन उजळून काढलस. माझ्या डोळ्यांतील अश्रू टिपणारा तु हक्काचा सोबती बनलास.मित्र बनून माझ्या आयुष्यात आलास आणि माझं सर्वस्व झालास.आयुष्यात जगण्याची उमेद हरवून बसलेल्या या नदीला तु प्रवाही बनवलस आणि समुद्रागत तुझ्यात सामावून घेतलस.माझ्या आईबाबांची माझ्यापेक्षा अधिक काळजी घेत त्यांचा मुलगा बनलास. श्रेयाच्या जन्मावेळी तर माझी आईच झालास. मी आनंदी असल्यावर तुझी कळी खुलते तर मी दुःखी असल्यावर तुझ्या चेहऱ्यावर अगतिकता दिसते. मी झोपल्यावरही कितीतरी वेळ जेव्हा मला एकटक पाहत असतोस तेव्हा खूप स्पेशल असल्यासारखे वाटते. माझ्या प्रत्येक दुःखात, अडचणीत तुला माझ्यापुढे राहायचं असतं. मंदार, तु आहेस म्हणून मी जिवंत आहे. तुझ्याशिवाय या जगण्याला अर्थच नाही. तु कधीच आमच्यामध्ये आलास नाही कारण माझ्या आयुष्यात तुझं स्वतःचं अस्तित्व तु निर्माण केलं आहेस ज्याशिवाय मी अपूर्ण आहे." तिने असे म्हणताच त्याने तिला उराशी कवटाळलं. डोळ्यांतील अश्रू तिच्या डोक्यावर प्रेमाचा वर्षाव करते झाले.